Në Kiev do të mbahet Konferenca e 4-të 'Crimea Global'

Në kryeqytetin e Ukrainës, Kiev, më 19 tetor do të mbahet Konferenca e 4-të Ndërkombëtare 'Crimea Global'. Ngjarja, e cila do të mbahet me temën 'Crimea Global: Kuptimi i Ukrainës përmes Jugut Global', do të trajtojë çështjet e zhvillimit të marrëdhënieve me vendet e Jugut Global, çlirimin e Krimesë dhe të territoreve të tjera të pushtuara, si dhe lirimin e pengjeve civile.

Sipas lajmit të publikuar nga Agjencia e Lajmeve QHA e Krimesë, konferenca e këtij viti, e cila do të mbahet me sloganin 'Gjetja e rrugës në botën e fuqive të mëdha', synon të forcojë marrëdhëniet e Ukrainës me vendet e Azisë, Afrikës dhe Amerikës Latine. Gjatë ngjarjes do të diskutohen problemet e përbashkëta, çështjet e sigurisë globale dhe pasojat e agresionit rus.

Midis qëllimeve kryesore të konferencës janë zhvillimi i dialogut me vendet e Jugut Global, tërheqja e vëmendjes ndërkombëtare për çlirimin e Krimesë dhe të territoreve të tjera ukrainase të pushtuara, lirimi i pengjeve civile dhe kthimi i fëmijëve ukrainas të dëbuar në mënyrë të paligjshme. Gjithashtu, në sesione do të vlerësohen ndryshimet në botë dhe roli i Ukrainës në këtë proces, bashkëpunimi ndërkombëtar në fushën e teknologjive moderne dhe lufta kundër përpjekjeve të Rusisë për të rekrutuar qytetarët e vendeve të Jugut Global në radhët e saj.

Nga Indonezia, Sri Lanka, Kenia, Brazili, Egjipti dhe vende të tjera pritet të marrin pjesë ekspertë, akademikë, gazetarë dhe mbrojtës të të drejtave të njeriut. Ata që dëshirojnë të marrin pjesë në konferencë mund të aplikojnë përmes formularit të regjistrimit të ndarë nga organizatorët. Detajet e konferencës do t'u dërgohen pjesëmarrësve të cilët kanë aplikuar dhe janë aprovuar nga organizatorët. U njoftua se për shkak të arsyeve të sigurisë, ora e saktë e ngjarjes dhe vendi ku do të mbahet do të shpallen më vonë.

Konferenca organizohet nga Përfaqësia e Presidentit të Ukrainës për Republikën Autonome të Krimesë dhe Zyra e Platformës së Krimesë, Qendra e të Drejtave të Njeriut ZMINA dhe Inisiativa e Medias për të Drejtat e Njeriut.

Burimi: QHA Kırım Haber Ajansı