Miteva: Mbështetje për Malin e Zi në procesin e anëtarësimit në BE

Zëdhënësja e Qeverisë së Maqedonisë së Veriut, Marija Miteva, njoftoi se vendi i saj e mbështet procesin e anëtarësimit të Malit të Zi në Bashkimin Evropian (BE). Miteva theksoi se ky proces duhet të bazohet në meritokraci dhe shprehi gatishmërinë për bashkëpunim me të gjitha shtetet në Ballkanin Perëndimor.

Sipas raportimit të Aktuelno.me, Miteva nënvizoi se vlerat, parimet dhe rezultatet e arritura duhet të jenë prioritet, dhe se kriteret e barabarta duhet të zbatohen për të gjitha shtetet që synojnë anëtarësimin në BE. "Vlerat, parimet dhe arritjet duhet të jenë prioritet, pra të njëjtat kritere duhet të zbatohen për të gjitha shtetet. Mund të them se Maqedonia është e gatshme për bashkëpunim me të gjitha vendet në Ballkanin Perëndimor, por presim që marrëdhëniet e mira të fqinjësisë të jenë një rrugë me dy drejtime, pra që dëshira për bashkëpunim të shprehet nga të gjitha palët", tha Miteva.

Duke theksuar se bashkëpunimi rajonal dhe mbështetja e ndërsjellë në integrimet evropiane janë themelet e qeverisjes së mirë dhe e përparimit, Miteva u shpreh: "Bashkëpunimi rajonal është jashtëzakonisht i rëndësishëm. Mendoj se ai përbën bazën e qeverisjes së mirë. Qeveritë që vërtet kujdesen për përmirësimin e jetës së qytetarëve duhet të sigurojnë zhvillimin e mëtejshëm të tij. Vetëm në këtë mënyrë mund të përparojmë si partnerë të fortë që bashkëpunojnë konkretisht". Miteva shtoi se Procesi i Berlinit lejon jo vetëm dialogun politik, por edhe bashkëpunimin konkret midis vendeve të rajonit.

Miteva deklaroi se Maqedonia e Veriut është ende e bllokuar në rrugën evropiane, por anëtarësimi në BE mbetet qëllimi strategjik, duke nënvizuar se prioritet janë zbatimi i reformave dhe përmbushja e obligimeve të marra. Ajo informoi se gjatë dy viteve të fundit janë përqendruar seriozisht në përmbushjen e obligimeve në axhendën e reformave dhe se përfaqësuesit evropianë e kanë njohur dhe mirëpritur këtë progres. "Vërtet, gjatë dy viteve të fundit u përqenduam seriozisht në përmbushjen e obligimeve në axhendën e reformave. Në të gjitha fushat që na takojnë, po përmbushim me sukses të gjitha obligimet e marra brenda afateve të përcaktuara. Shumë përfaqësues evropianë e kanë njohur këtë progres dhe e kanë mirëpritur në mënyrë të qëndrueshme", tha ajo.

Miteva shtoi se Maqedonia e Veriut është vendi i parë në rajon që ka harmonizuar plotësisht politikën e jashtme dhe të sigurisë me BE-në, gjë që dëshmon qëndrueshmërinë strategjike të vendit. Nga ana tjetër, në kuadër të Procesit të Berlinit, Kryeministri i Maqedonisë së Veriut deklaroi se vendi i tij meriton të bëhet anëtare e BE-së.

Burimi: Aktuelno.me