Kosova dhe SHBA-ja bashkëpunojnë kundër krimeve financiare

Prokurori i Shtetit të Kosovës, Zejnulla Gashi, dhe përfaqësues të Departamentit të Thesarit të SHBA-së u takuan me qëllim të rritjes së bashkëpunimit në fushën e parandalimit të pastrimit të parave, konfiskimit të pasurive ilegale dhe hetimeve për krime financiare.

Sipas raportimit të portalit Kosova Port, gjatë takimit të mbajtur në Prishtinë, delegacioni amerikan i udhëhequr nga Joseph W. Burke dhe Norman Richard Smith shqyrtoi mundësitë e ofrimit të mbështetjes profesionale dhe ekspertizës për prokurorët shtetërorë, me qëllim të rritjes së kapaciteteve për luftën kundër krimeve financiare dhe ekonomike.

Në një njoftim të Prokurorisë së Shtetit u bë e ditur se zyrtarët amerikanë shprehën gatishmërinë për të mbështetur mekanizmat e ngritura nga Prokurori i Shtetit, veçanërisht mekanizmin e Mbikëqyrjes së Aktivitetit të Prokurorit të Shtetit.

Gashi, nga ana tjetër, shprehi dëshirën për thellimin e bashkëpunimit me Departamentin e Thesarit të SHBA-së, në mënyrë që të rritet efikasiteti institucional dhe të forcohet sundimi i ligjit.

Burimi: Kosova Port