AP kërkon operacion detar në Detin e Zi

Parlamenti Evropian (PE) miratoi një projekt-rezolutë që i bën thirrje Bashkimit Evropian (BE) të shqyrtojë mundësinë e organizimit të një operacioni detar në rajon, pas rritjes së sulmeve ndaj anijeve civile tregtare në Detin e Zi. Projekt-rezoluta u aprovua me 432 vota pro kundrejt 52 votave kundër dhe 88 abstenimeve, gjatë seancës së Asamblesë së Përgjithshme në Strasburg.

Sipas raportimit të publikuar nga Haberler.com, rezoluta e miratuar e mban Rusinë përgjegjëse për sulmet e fundit të kryera pranë brigjeve të Bullgarisë dhe Rumanisë, si dhe për shkeljet e përsëritura të hapësirës ajrore rumune. Në dokument theksohet se sulmet ndaj anijeve civile në perëndim të Detit të Zi janë pjesë e strategjisë së Rusisë për përshkallëzimin e luftës kundër Ukrainës dhe se Moska ka synuar sistematikisht transportin detar civil.

Rezoluta vlerëson përpjekjet e ekipeve të shpëtimit detar, policisë kufitare të Rumanisë dhe Bullgarisë, si dhe punën e anijeve tregtare që kalonin nëpër rajon, ndërsa kritikon qëndrimin e qeverisë bullgare ndaj kërcënimit rus. Duke theksuar rëndësinë e lirisë së lundrimit dhe sigurisë detare për krahun lindor të NATO-s dhe rajonin e Detit të Zi, kërkohet nga BE-ja dhe shtetet anëtare të shqyrtojnë mundësinë e një operacioni detar. Gjithashtu, bëhet thirrje për NATO-n që të vlerësojë iniciativën "Rojtari i Detit të Zi" në dritën e negociatave aktuale, ndërsa theksohet rëndësia e forcimit të bashkëpunimit rajonal midis Bullgarisë, Rumanisë dhe Turqisë.

Burimi: Haberler.com